تحدثوا عن صورة

بــاكـ ..

صورة لشهادة الصف الأول إبتدائي عام 1384هـ 1964م
المدرسة المحمدية الإبتدائية بجدة

للسيد : صالح علي المسند ..


ويقول عنها السيد /صالح:

الشهادة لها قصة : حيث كان يوم تسليم الشهادات في وقت العصر عام 1385هـ 1965م . فروحت انا واخوي نستلم شهاداتنا ( شهادة الدكتوراة ) المهم انا عارف نفسي وعارف الشهادة بتكون ايه يعني ما راح أتفاجأ ، المهم استلمتها وكان كل طالب يوري زميله شهادته فرحان بالنتيجة ، إلا أنا فمسكتها بيدي وهات يا جري من المدرسة مستمر بصوت عالي : نااااااااااااااااااااااااااااااجح ، وكل من قابلني يبقى يمسكها بيده أويشوفها اروح ناتشها بسرعة وتصويت ناااااااااجح الين وصلت البيت وهناك رميتها على الطبطاب ولعنت التعليم في السعودية و اللي وضع المناهج المملة فيها لأنه كله حش كتب يحملها الطالب على ظهره كالحمار يحمل أسفارا ..


من الطرف : كان مربي الفصل هو الأستاذ / فؤاد وهو فلسطيني ابن حلال معانا بس شغال بزنس ، اذكر أنه كان يجيب علبة حليب نستلة كبيرة مليانة مراسم ابو تمساح شئ كامل وشئ نصف وشئ ربع ومشي حالك ، المهم لما يشوف طالب مرسمته خلاص صارت على الجنط ( النهاية ) يروح مطلع له مرسام من العلبة ويبيعها له بقرش وهو وحظه تطلع كبيرة والا صغيرة والا مسخوطة ..

موقف طريف لا زلت اتذكره معاه : مرة قال تعال وسمع : يا وردتي يا بهجتي . وكنت ملحن كل المنهج على أغاني طلال مداح وعبدالله محمد والسندي ، المهم أخذت أصدح بذلك اللحن وأنشد الأنشودة فقام الفصل كله يردد منسجم لأنهم عارفين اللحن ماشاء الله عليهم في الأغاني بلابل لكن في الدروس أقفال زي بعض الناس المهم زعل فؤاد مني وقال لي : أنصرف ولاك ، أنا رحت للماصة ودفيت الطالب الطرفاني فيها وأخذت شنطتي وجيت خارج من الفصل لأنه صرفني الأستاذ بدري ، ألتفت لي الأستاذ فؤاد وقال : ولاك وين رائح؟؟؟ قلت له : أنت مو قلت لي : أنصرف !! رد وقال : لك يا زلمة أنصرف أقصد على مقعدك .. يا فرحة ما تمت ..




نرجع للشهادة : شوفوا كم تلميذ في النصف الأول وكم تلميذ في النصف الثاني ، في 11 طالب تركوا المدرسة من الزهق من المناهج المملة ومن الفلكة