,. الشــــبة و التـــــعاليـــــــل .,

السلام عليكم

موجود احد بالمشب

حياكم الله يالبنيخي000

المعذره رحت اجيب حطب من النفود بجنبنا ماهي بعيد قرطة عصى (200) كيلو بس

وقالوا اني اخرب البيئه ووقفوني واخذوا الحطب ودوه لمشابهم وياويل البيئه منهم هم

وجيتكم000



الاخ : جزاء تقهو يقولون الشرقيه ماحد يشب نار النار مشبوبه خلقه بالحفر والدمام خدر شاي من الحنفيه مباشره

يعني الماء بهالوقت في هالمنطقه للطبخ وليس للغسيل لاتوهق اكلناها قبلك ياحليلك ياعرعر هههه.


الاخ : ناصر عبيدالله , حياك الله في ذيك الرحله العيد جاي جاي اوله يوم تخبط الطياره العراقيه والحمد لله سلمنا منها
وثانيها نبي نعطي رموز علشان المشاهد يزداد اشتياقه ( حمول البصل + الخيزرانه + الترك+ الطائرة العراقيه)
والله مشكله حوادث طيران وحوادث سيارات اكيد يزين الشاي بعدها, ابشر ببراد مثله بس بدون حوادث هههه

وعليك سالفة توفيتت الساعه للسفر الى عرعر لازم تسولفها بالتعلوليه والفنجال عندك.......هههههههه


الاخ :ابو نواف هلابك جداً رائع : وعليك سالفة الصوره ومكان الصوره اللي انت جالس بين هالجيلان لازم حدثت سالفه,


الاخ : الزير هلابك عليك سالفة راعي صفقة الكف اللي أنت توهقت معه ههههههه .


وهلااا بالجميع الليله حصلنا لكم ثلاثة سوالف وانا ابرش ماء قدام البيت ع شان تزين التعلوليه



وحياكم الله

ياشباب :


الشبه : قلنا صبح وعصر

يعني اللي يدخل ماقدامه احد هو راعي الشبه والبقيه مجلس وسوالف وان مالقوا سوالف ( قطعون براعي الشبه) تعليق وتصفيق

التعلوليه:

راحه للمعزب : ثلاثة ايام : يعني من المغرب يكون النظام تعلوليه الى الفجر سوالف نكت شعر اراء نقاش خباوي نصائح
تقاطيع شطحات ضحكات تعليقات بين الموجودين كل واحد له مركى والمخومس كله مجلس بهالقمراء ولجة سلاطين بطلابه




ياشينين مابكم احد عطانا راي تحسين منا والا منا هه والا هه الين هذي هي اهم شئ بالعاميه

^^^
اما لو تحدد وقت المشب من الساعه الفلانيه ليييه السااعه الافلااانيه يكون افضل

المشاركة الأصلية كتبت بواسطة al9l6any

^^^
اما لو تحدد وقت المشب من الساعه الفلانيه ليييه السااعه الافلااانيه يكون افضل

هلااابك اخي


اخي التقيد بالوقت المحدد يفشل التجمع ولأجل ذلك وضعنا شبه وتعلوليه وهي كافيه لتغطية الوقت

وعند التطبيق سوف تلاحظ التواجد صباح شبه لمن يتواجد الصباح ادخل اما ان تشب او تقهوا ضع المشاركه وسوف نجدها
العصر كفيله لمن يدخل العصر

الليل هي الرسميه في التعلوليه يمكن ارد خلال الثلاثة ايام مو شرط باليوم نفسه للتحظير

لها مثل طلبت منك اليوم سالفه لك خلال استلامي للتعلوليه واذا لم ترد خلال هذا الوقت سوف نطبق
جزاءات مثل جزاء الاولين وهي في الاحق بأذن الله


المهام بسيطه وفقك ربي

السلام عليكم


الله يحييكم

اقلطوا يا اخوان قدامكم الاخ شامخ ملبد من الظهر والله مادري

يمكن حاط الفروه على المركى او ناسي فروته


ابو بدر تونا مصلين ومتعشين

عطنا السالفه

واعذرونا من القصور وبيوت الشعر والصنادق
وراعي الغنم ماهوقريب والا ذبحنا حديكم لهن

حيالكم الله الشبة عندنا ياشباب أقلطوا

ونعم ابو بدر , كفو

ابو بدر مو انك اكبر مني تخليني اقهويك وانت اللي مسوي الشبه


بما أنك المعزب الليلة ياليت تقص لنا عن رمضاناتكم أيام الشباب وش كان البرنامج في ظل غياب التقنية الحالية عن جيلكم ..

حياك الله باأبوفهد

بس لو أنك ما جبت سالفة جيلكم 0000 رمضان لهو روحانية خاصة وطعم ثانى أذكر وحنا أصغار بالكويت

وايام الحر كانوا يحطون الفيمتو بصطول حديد ما كنا نعرف الدولكة حقت العصير والله لايوريك الواحد يطلع

أدرع من الفيمتو

وكانوا الجماعة كل يوم الفطور عند واحد كان فية ألفة لكن هالوقت زين تلقا واحد يفطر عندك وما كنا نعرف

الحلويات والفطائر اللى موجودة اليوم الله لا يغير علينا

وسنة من السنين عام 1401 كنت بالاردن للدراسة أنا وأحد الشباب وهل علينا شهر رمضان المبارك وتعرف

كل بلد لهو طبيعة وأنعزمنا عند واحد من الاخوة الاردنيين وحنا ياربعك متعودين على القهوة على الفطور والجماعة

يفطرون على عصير وكيك قام اللى معى وقال وين المطبخ وسوا قهوة وتقهوينا بعد الفطور 0 ويطول عمرك يا أبوفهد

مساكم الله بالخير اجمعين

وشلونك ياانسان شلونك ابو بدر

بالنسبه للصور هذي بتركيا ( أوزنقل ) ياسلام على ذيك القعده براد وشاي تركي على كيفك

لازم تضبطلنا لوخضار صناعي بهالمشب ههههههه