يالعبد لو ميزت فـي كـل الاحـوال

السلام عليكم ورحمة الله وبركاته

قصيدة أعجبتني للشاعر /طايل الذويبي وحبيت أنقلها لكم

يالعبد لو ميزت فـي كـل الاحـوال
عرفـت ويـن المخطيـه والمصيبـه
وعطيـت واف الحـق قـدام ينقـال
مخطي وتصبـح بيـن شـكٍ وريبـه
الحق مايزعـل منـه غيـر الانـذال
اهل الردى واهل والوجيه الغضيبـه
دام السريره صافيـه فأنـت رجـال
واليـا دخلهـا غـش والله مصيـبـه
الحر لو ماحـط لـه بشـت وعقـال
يكفيـه بيـن النـاس فعلـه وطيبـه
وراع الردى لو بأجمل اللبس يختـال
تلقى الـردى مابيـن كمـه وجيبـه
ومن لاكسب كلمة نعم بيـن الاجيـال
يكسب بدلهـا ياهـل العـرف خيبـه
ومن لا شرب لمواجه الوقت فنجـال
يقضي العمر بيـن الطمـان وشعيبـه
ومن لاتحدى في الزمن بحر الاهوال
اللـول والمرجـان ماهـو نصيـبـه
ومن لاحسب قبل النسب معدن الخال
لاينشـد المولـود مـن ويـن عيبـه
ومن لادفع في ماقف الربـع مثقـال
لا ينتظـر تعطيـه ربـعـه زبيـبـه
ومن لا طلب للمشكلـه نـاس عقـال
يجيـه مـن عميـان الاريـا كتيبـه
ومن لاحفظ سمعه عن القيل والقـال
تلقـى ورم مخـه نميمـه وغيـبـه
ومن داس عرض الناس لو كان بالمال
من عرضه المصيون دفع الضريبـه
ومن لاحسبها صح في عمر الاقبـال
ماهـو بحاسبهـا ليـا بـان شيـبـه
سمعـت ماقالـوه قبلـي بالامـثـال
من لاكسـب كلمـة نعـم وش تبيبـه
جنب عـن الرديـان وكبـار الازوال
وتلقى من اهل الخير من تعتزي بـه
هذي نصيحه كان مـا اعطيتهـا بـال
أتضيـع بيـن المخطيـه والمصيبـه