يروح العمر والمركب يسير وهالزمان يدور .. !

للتواصل مع ابناء العمومه في هذا الصرح النقي بكل مافيه متواضعه لقلوبكم .

ولأن الصوره دائماً ماتكون هي المحرض للشعر بالنسبه لي
هنا قصيده ازفها الي ذلك الماضي البعيد الذي لن يعود
والذي كانت ملهمته هذه الصوره بكل تفاصيلها

سقالله يازمن من وين ذاك المنـزل المهجـور=بعد ماكان منـزل عامـر بأهلـه واحبابـه
تهدم مابقى منّه سـوى بـاب وبقايـا سـور=ولكن مع مرور الوقـت باقـي شامـخٍ بابـه
يسولف للزمن عن ماضي الذكرى وموت النور=وكنّ الشمس من خلفه تزول وتعلـن غيابـه
بقى خالي بعد ماكان بأهله شامـخ ومعمـور=ومن جرد السنين أصبح رفات وغادر أصحابه
يروح العمر والمركب يسير وهالزمان يـدور=وتفرقنا الليالي بس ذكـرى الأمـس تبقابـه
صحيح الناس لا قالوا ذكر أهل الوفا مخبـور=ترى حتى ولو زال الجسد يبقى على.. ترابـه
تغيب ايامهم لكن تسجلهـا القلـوب حضـور=وتبقى سيرة الغالين رغـم المـوت واسبابـه
ذكرتك وانتهى عهد وبقى ذكرك بنـا محفـور=أبد مايختفي حبر الزمن مـن صفحـة كتابـه
وأنا يالشعر لوسقت القوافي شاعرك معـذور=عزيز ٍ تسكن الذكرى بوسط العيـن وأهدابـه
ومدام القول عندي ماتحكمه غايـه ودستـور=هنا هديت بْحساس القصيـد ونـوّخ ركابـه
غني بشعري وعادي اكون بساحتـه مغمـور=ولاهمتنـي الشهـره ولافـكـرت بألقـابـه
هنا والموقف أجبرني لعينك يالحنيـن اثـور=وأعود لماضي احبابي وأعيش الأمس وأحيابه