ليت هالعين ضاقت بالحدق ** قبل جدرانها بوجهك تضيق
و الله اني صحيت من الأرق ** راحلن لا مكان و لا رفيق
و ما سمعت الغراب اللي نعق ** وين مثلي على مثله يفيق
منزلي في الطويل اللي شهق ** و منزله ظلمة الوادي السحيق
قالوا الحاسد بدمك شرق ** قلت ماظنه لمدحي يطيق
كنه الشوك في ثوبي علق ** يودي الشوك و لا يقطع طريق
تزعل الخلق و يرضى من خلق ** و يصبح العبد من ذنبه طليق
كثر ماالريح تعبث بالورق ** و توقد اغصانه الصفرا حريق
و كثر ما شوه العج الشفق ** و قص من جيده عقود العقيق
و كثر ما صابني و اخطا التفق ** لين ماصبحت من خوفي طليق
و كثر ما نز في خفوقي العرق ** من سلام على غير الصديق
اتركوني على باقي عبق ** غيمة العطر من عمري العتيق
بدر بن عبدالمحسن
|