(1)
كان يحبو، كان يخطو، كان يمشي، كان يركض..
كان داير مع دواليب الزمان..
.. وكان به حاجة غلط!!
كلهم كانوا يجون، ويضحكون، ويزعلون، ويرحلون..
بس وحده ظل باقي بالمكان!!
(2)
صَبّ عينيه بـ يدينه..
مدّها مثل الشريط براحتينه..
عاين بقلبه سلام الغايبات من الأماني..
طاح من كل المشاهد دَمْع شفّاف وأناني..
راح ناسي من يكون..
تارك احلامه مع ايامه وراه..
يمشي وماله عيون!!
(3)
قبل: كل التجاعيد مرهونة بأيام اتحبي..
بعد: نفس التجاعيد موجودة، عليها كم يوم..
ما بينهم: ضوّ.. ومرايا صابرة تقرا تجاعيد الغبي!
(4)
حاول يهادن جروحه بالغُنا..
حاول يخفف وجعها.. ما عَصَتْ..
بس قامت.. ورقصت!!
(5)
ساكت، ويبغى يتعلّم..
ساكت، وعمره ولا فكّر يقول، وما تكلّم..
ساكت، وما كان يعرف ينطق الآهات صح..
لين ما مات.. يتألم!!
|