منتديات السلاطين الرسمية - إليكم رائعة من روائع الشاعر /فرحان قيران الدهمشي

السلام عليكم ورحمة الله وبركاته

يقول الشاعر فرحان موصياً ابنه فيصل عندما اتى وداعه للدراسه في الرياض وكان عمه ابو نواف مقيما هناك فقال هذه الرائعه :

يضحك وأنا أضحك والمحاجر مجامير **ضاقت علي من يوم قرب مراحـــه
الولف تشكي منه حتى العصافيــــر ** امسك فروخ الطير واطلق سراحـــــه
اوصيك يافيصل ولا أبي منك تقصــــير** ترى الولد لازم يواصل كفاحــــــه
سج القدم والله عليه التدابـــــــــــــــــــير** ماينفع المشفوح كثر الشفاحــــــــــه
سلم على عمك زبون المخاســــــــــــــير** أخوي ابونواف رمز السماحــــــه
عمك تراه من الرجال المشاهــــــــــير** زودن على طيبه بعقله رجاحـــــــــه
أزعل ويرضيني بلطف وتقديـــــــــر ** اقفي ويرجع لي بعطف ونصاحــــــه
عمك لياضاقت عليك المعابيـــــــــــــر** ياقف ويفتح لك ورى الباب ساحــــه
تلقى بديوانه ضيوف ومسايـــــــــــــير** لاصك باب ولا اشترك باستراحــــه
ما يتقي دونك بكثر المعاذيـــــــــــــــر** إليا ثقل حملك قعدله وزاحــــــــــــــه
ياصارت العيشه بحد البواتيـــــــــــــر** يطري على الرجال ماضي سلاحـــه
سلم على عمك قله ترى الطـــــــــــــير** ماينتهض صدره بليا جناحــــــــــــه
((هنا نقلة نوعية بالقصيدة تذكرني بالشعراء الكبار منذ القدم حيث الانتقال بسلاسه من مكان الى آخر في القصيدة دون ان تشعر كقارئ ....
قله معي عن حاله العود تقريــــــــــــــر** يقول واليا قال قال الصراحـــــــــه
البارحه مابين ورد ومصـــــــــــــــادير** همي سرابي والخفوق استباحــــــه
ياكن يركزبالمحاجر مساميـــــــــــــــر** والغيض بضلوعي تعاقب رماحــــه
كنه يدق بطبلة إذني مزامـــــــــــــير ** وإلا صدى نجري كثير صياحـــــه
هم وعنا واقلاق راحه وتفكــــــــــــير** خليط مابين الفرح والمناحــــــــــــه
طبخة عنا والمشكله بالمقاديـــــــــــــــر** كبرالجبال هموم وشوي راحــــــــه
نوبات اشوف القاع ورد ونواويـــــــر** ونوبات بعيوني تضيق المساحـــــه
لاصبح الله ضيقة الصدر بالخيـــــــــر** شدة على قلبي مساه وصباحـــــــه
بعض المرض يكفيه حبه وتخدير ** وبعض المرض يبغى طبيب الجراحه
ياموردالمضمي على جمة البــــير** عقب الضمى ياجاك يارد قراحــه
اتعب قدم رجلي كثير المشاويــــر** عيشة زمان اليوم عيشة وقاحـــه
تجري بها العالم سواة المداويــــر** هذايقوم وذاك يكثر طياحـــــــــه
والرزق بيد اللي يسوق المزابــير** منشئ السحاب اللي ثقيل لقاحـــه
قلته وأنا مابين عذال ومشـــــير** لافاتح متجر ولالي فلاحــــــــــه
الناس تنصحني وأنا مذهبي غـــير** بعض النصايح ترتقي للبجاحــه
لادست عيب ولاوطيت المحاذيــر** ولاني من اللي يرغبون السياحه
هذي حياتي ياسطام المناعـــــــير** نوبات ركض ونوب اسبح سباحه

صح لسانك يابو فيصل